Rhifyn 126   Mai 1998


PARTI PONTY

Ar ddydd Sadwrn 4ydd o Orffennaf bydd Parti enfawr ym Mhontypridd. Bydd Menter Iaith, Radio Cymru, Mudiad Ysgolion Meithrin a'r Urdd yn trefnu diwrnod llawn o hwyl ar bedair llwyfan ym Mharc Ynysangharad. Yn ogystal â pherfformwyr o ysgolion a chymdeithasau lleol disgwylir rhai o grwpiau mwyaf poblogaidd Cymru - Sobin a'r Smaeliaid, Siân James, Gwachamole, Iwcs a Doyle ac eraill.

Oherwydd y diddordeb yn y diwrnod a gychwynnodd fel Raligamps y Fenter Iaith mae S4C yn ystyried dod â phabell a chamerau i'r wyl. Bydd yn ddiwrnod i'w gofio - felly cadwch y dyddiad yn glir.

CYHOEDDI CYNLLUN ADDYSG

Mae Cyngor Sirol Dinas Caerdydd wedi cyhoeddi cynllun ar gyfer addysg Gymraeg yn y Sir. Mae'r cynllun yn ystyried cynyddu'r ddarpariaeth addysg Gymraeg ar gyfer disgyblion dan 5 oed, ystyried agor ysgolion cynradd Cymraeg newydd, datblygu addysg Gymraeg ail-iaith a datblygu'r ysgolion uwchradd Cymraeg.

Mae'r cynllun yn ystyried y cyrsiau Cymraeg a roddir gan golegau trydyddol y ddinas ond nid yw'n trafod darpariaethau eraill Adran Addysg y Cyngor Sir megis Addysg i Oedolion a Chanolfannau Ieuenctid.

Mae'n siwr y bydd trafod helaeth ar y ddogfen gan rieni ac athrawon yr ardal. Gofynnir i unrhyw sylwadau gael eu rhoi erbyn Mai 8ed. Gellir cael gwybodaeth a chopi o'r Cynllun oddiwrth Mr Rhodri Jones, Adran Addysg y Ddinas. Ffôn: 01222 872000.

RHAGOR O BLANT

Disgwylir i'r nifer o blant sy'n cychwyn yn yr ysgol yn ystod y ddwy flynedd nesaf i gynyddu yn sylweddol yn Rhondda Cynon Taf. Mae'r awdurdod iechyd wedi rhoi gwybodaeth i'r Cyngor Sir y bydd 500 o blant yn ychwanegol yn cychwyn yn yr ysgol. Bydd hyn yn cynyddu'r cyfanswm o blant dan 5 oed sy'n derbyn addysg o 8,750 nawr i 9,281 yn y flwyddyn 2000.

Mae'r Cyngor Sir yn disgwyl ehangu y ddarpariaeth feithrin - bydd rhaid pwyso fod ehangu yn y ddarpariaeth drwy'r Gymraeg yn digwydd ar yr un pryd.

YR URDD YN DATBLYGU

Yn y rhifyn hwn o Tafod Elái rhoddir gwybodaeth am ddatblygiadau newydd i ieuenctid yn yr ardal.

Fe fydd pedwar o swyddogion yr Urdd yn yr ardal sef Dyfrig Morgan, Rhodri Francis a Delyth Caffery yn ogystal â swyddog ieuenctid y Dalaith, Aron Evans. Mae'r Urdd wedi cynyddu yn sylweddol buddsoddiad o staff yn yr ardal yn ystod y pedair blynedd dwetha. Disgwyliwn weld syniadau cyffrous a newydd yn dilyn y buddsoddiau newydd yma gan yr Urdd.

POB HWYL YN EISTEDDFOD YR URDD
PWLLHELI 25 - 30 Mai