Rhifyn 128   Mehefin 1998


PARTI PONTY

Nos Wener, 3 Gorffennaf
yng Nghlwb y Bont
Steve Eaves, Ysbryd Sushen,
Mim Twm Llai

Dydd Sadwrn - 4 Gorffennaf Parc Ynysangharad
Martin Geraint, Côr Ysgol Evan James, Noson Lawen Diawled Dawnus, Côr Ysgol Bodringallt, Dawnsio Disgo Traed y Ddraig, Côr Ysgol Llyn y Forwyn, Dawnsio Disgo Ysgol Castellau, Ecstrafagansa 150 o blant Ysgol Llantrisant

Radio Cymru yn Fyw o'r Parc

11.00 Ram Jam Dafydd Du, Alun O, Beks ac Eden, Guacamoli a Geraint Jarman a'i fand.
1.00pm Hywel Gwynfryn, Kevin a Nia, Geraint Lloyd yn Taro'r Targed a Chris Needs ar y piano.
3.00 pm Jonsi, Bryn Fôn, Iwcs a'i Fand. Siân James.

Chwareon gyda'r Urdd a Chyngor Rhondda Cynon Taf.

Stondinau S4C, Gemau, Bandiau

Gig Nos Sadwrn Cymdeithas yr Iaith
Rheinallt H Rowlands a Silicon

SIOP Y BONT

Mae Siop y Bont ym Marchnad Pontypridd yn cynnig gwasanaeth newydd i drigolion yr ardal. Ann a Maldwyn Owen sy'n rhedeg y siop sy'n gwerthu llyfrau a chasetiau Cymraeg. Hefyd mae dewis o Gryno-ddisgiau a Fideos Cymraeg. Ar werth hefyd mae llestri ffein a phridd, gwaith glo a gwaith llechi yn ogystal â nifer o nwyddau Cymreig. Mae llyfrau ar gael i blant ac oedolion ac os nad ydynt mewn stoc gellir eu archebu yn fuan. Mae'r ddarpariaeth yma ym Marchnad Pontypridd yn hwb i ddelwedd y Gymraeg yn yr ardal ac yn wasanaeth pwysig i deuluoedd ac ysgolion. Mae'r siop ar agor o Ddydd Mawrth i Ddydd Sadwrn.

PARTI PONTY

Am y tro cyntaf erioed mae nifer o fudiadau sy'n ymwneud â'r iaith Gymraeg wedi dod at ei gilydd i greu diwrnod arbennig iawn i ddathlu'r ffaith fod yr iaith yn fyw, yn iach ac yn llawer o hwyl. Mae disgwyl i filoedd o bobol heidio i ddigwyddiad Parti Ponty ym Mharc Ynys Angharad, Pontypridd ar gyfer diwrnod o ddigwyddiadau, cyngherddau, a hwyl ar Orffennaf 4 eleni o 10.00am. A bydd y cyfan i'w glywed yn fyw ar BBC Radio Cymru wrth i'r orsaf ddarlledu sioeau arbennig iawn oddi yno drwy gydol y dydd.

Roedd Radio Cymru wedi gwahodd nifer o fudiadau at ei gilydd i greu diwrnod arbennig mewn ardal lle mae'r Gymraeg yn tyfu, ac ers hynny mae sawl corff fel Menter Iaith , Mudiad Ysgolion Meithrin, Yr Urdd, Yr Eisteddfod Genedlaethol, Golwg, Y Cymro, Cymdeithas yr Iaith, S4C, Cyngor Rhondda Cynon Taf, Cwmni Recordiau Sain ynghyd â nifer o gyrff ac unigolion eraill wedi bod yn cynllunio diwrnod na welwyd ei fath erioed o'r blaen!

Penderfynwyd mynd i Barc Ynys Angharad er mwyn cydweithio'n agos â'r Fenter Iaith yn Rhondda Cynon Taf sy'n cynnal digwyddiad llwyddiannus o'r enw "Raligamps" bob blwyddyn. Fe fydd gwahanol ddigwyddiadau o gwmpas y maes ar gyfer pobol a phlant o bob oed ac adloniant byw gan fand pres, grwpiau pop a gwerin gan gynnwys Eden, Gwacamoli, Sian James a Bryn Fôn. Fe fydd S4C yn cynnal sioe arbennig yn ystod y prynhawn, ac fe fydd sesiynau hyfforddi chwaraeon gyda chwaraewyr pêldroed. rygbi a thenis yn y parc.

Bydd ysgolion cynradd ac uwchradd o'r ardal yn perfformio, ac fe fydd nifer o wahanol stondinau ar wasgar o gwmpas y maes.

Yn ogystal â hyn, bydd dau gyngerdd wedi eu trefnu gan Gymdeithas yr Iaith Gymraeg yn cael eu cynnal yn ardal Pontypridd ar nosweithiau Gwener a Sadwrn, a bydd disgyblion ysgol yn cael cyfle i baratoi rhan o bapur newydd Y Cymro ynghyd â pharatoi rhaglen a fydd y cael ei darlledu ar BBC Radio Cymru yn ystod y dydd.

Yn ôl Aled Glynne Davies, Golygdd Radio Cymru: "Bwriad y diwrnod yw dangos hyder yn yr iaith, a dangos gwerthfawrogiad i bawb sydd wedi gweithio'n galed iawn yn y rhan yma o Gymru i godi ymwybyddiaeth pobol yr ardal o'r iaith Gymraeg."