Rhifyn 129   Gorffennaf 1998


LLWYDDIANT PARTI PONTY

Daeth dros 3,000 o bobl i ymweld â digwyddiadau Parti Ponty ym Mharc Ynysangharad ar ddechrau mis Gorffennaf. Am ddiwrnod cyfan roedd y parc yn fwrlwm o weithgareddau Cymraeg o chwaraeon i goginio, o'r grwpiau pop mwyaf adnabyddus i'r dawnsio gwerin mwyaf deheuig.

Daeth stondinau o nifer o fudiadau lleol a chenedlaethol ac roedd tri llwyfan a'r bandstand yn cynnig dewis eang o gerddoriaeth a hwyl i ddifyrru pawb.

Llongyfarchiadau i dîm Menter Iaith, Radio Cymru a'r Urdd am drefnu gwledd arbennig. Diolch hefyd i'r llu o ysgolion a mudiadau a ddaeth i gymeryd rhan.

EHANGU YN NANTGARW

Mae Cwmni General Electric (GE) yn bwriadu ehangu eu safle cynnal a chadw ac atgyweirio peiriannau awyrennau yn Nantgarw.

Prynwyd y gweithfeydd yn Nantgarw oddi wrth British Airways yn 1991 ac mae nifer y gweithwyr wedi codi o 1,000 chwe mlynedd yn ôl i 1550 gan wneud safle Nantgarw ymhlith y mwyaf sydd gan GE tu allan i'r Unol Daleithiau.

Mae GE yn buddsoddi £21m ymhellach yn Nantgarw i gynnal a chadw ei peiriant jet mwyaf, y GE90, sy'n rhoi pwer i'r awyren Boeing 777, awyren dwy-jet teithiau hir cwmni BA. Yr uned profi peiriannau jet newydd yn Nantgarw yw'r mwyaf o'i fath yn y byd. Mae gwerthiant Cwmni GE yn Nhrefforest wedi cynyddu o $270m yn 1993 i $750m y flwyddyn diwethaf. Ac eleni disgwylir i dros hanner y gwaith ddod o gwmniau awyrennau tramor.

YMGYRCH I ACHUB TALYGARN

Mae Awdurod Iechyd Bro Taf yn ymgynghori ar y bwriad i symud eu gwasanaeth gwella cleifion o Ganolfan Talygarn ger Pontyclun i'r Ysbyty newydd yn Ynysplwm. Ond mae Fforwm Talygarn a'i gefnogwyr am gadw'r gwasanaeth unigryw a geir yn Nhalygarn ar agor. Maent o'r farn nad yw'r Awdurdod Iechyd wedi profi nad oes galw am y gwasanaeth arbennigol a gynigir ac na fydd y ddarpariaeth newydd o'r un safon.

SWS

Bydd disgyblion Ysgol Gyfun Llanhari ac ysgolion eraill yn cyflwyno pum perfformiad o ddrama gerdd newydd sbon - Sws am Noson ar 31 Gorffennaf, 1 a 2 Awst.

Cawn ddilyn hanes grwp pop yn Ne Ddwyrain Cymru a Llundain yn y sioe gyfoes, liwgar, gyffrous hon sy'n wledd i'r glust a'r llygad ac yn goglais y meddwl.

Ffoniwch 01443 237824 am docynnau.