Tapestri
Ysgol Gwaelod y Garth

DIGWYDDIADAU
CAPEL BETHLEHEM, Gwaelod-y-Garth, 10.30am oni nodir yn wahanol. Rhagfyr 5: Gweinidog a Chymun; Rhagfyr 12: Ymweld â chartrefi'r henoed; Rhagfyr 19: Oedfa Nadolig y Plant am 5pm; Rhagfyr 25: Oedfa yng ngofal y Gweinidog am 9am; Rhagfyr 26: Plygain am 5pm.

CYLCH TI A FI, Ffynnon Taf: bob prynhawn Mawrth yn ystod y tymor, Neuadd Pentre' Ffynnon Taf, 1.30-3pm. Manylion oddi wrth Heather Rollinson-Davies, 01222 811582.

CYLCH MEITHRIN Gwaelod-y-Garth, 9-3.15, Festri Capel Bethlehem, Gwaelod-y-Garth.

CYMDEITHAS ARDDWROL Ffynnon Taf a'r Cylch: dydd Mawrth cynta'r mis, Clwb Cyn-Aelodau'r Lluoedd Arfog, Glan-y-Llyn. Manylion oddi wrth Mrs Toghill, 01222 810241. 

DAWNSIO DILYNOL MODERN: bob nos Sadwrn, Neuadd y Pentre', Ffynnon Taf, 7.45-10.15pm. Manylion: 01222 561991. Bob nos Fercher, Neuadd y Pentre', Gwaelod-y-Garth, 7.30pm.

YSGOL GWAELOD-Y-GARTH: Rhagfyr 5: Cymdeithas Rhieni ac Athrawon yn canu carolau. Ymgynnull ym maes parcio Canolfan Arddio Caerffili am 2.45pm. Mwy o fanylion oddi wrth Catrin Redknap ar 01222 843921.

Rhagfyr 8, Cyngerdd Nadolig, Capel Bethlehem, 1.30pm, 6.30pm; Rhagfyr 9, Cyngerdd Nadolig, Capel Bethlehem, 6.30pm.

Rhagfyr 17: diwedd tymor. Ionawr 4: diwrnod hyfforddiant-mewn-swydd i'r athrawon. Ionawr 5: dechrau tymor i'r plant. 

WEIGHT WATCHERS: bob nos Iau, Neuadd Pentre' Ffynnon Taf, 6pm. Mwy o fanylion: 0345 123000.

Stori'r Daith i Israel
Wrth inni fynd i'r Wasg, roedd ditectifs Heddlu'r De'n holi dyn yn Israel am lofruddiaeth yn Chwarel y Dolomite yng Nghoedwig y Garth yn 1963.
   O ddydd Mercher, Tachwedd 24, ymlaen, fe ddechreuodd Ditectif Ringyll a Ditectif Uwch arolygydd holi'r dyn sy'n enedigol o Dde Cymru. Yn ôl yr heddlu, mae'r dyn yn y ddalfa ar ôl cyflawni trosedd arall ac mae trefnu'r ymweliad ag Israel wedi bod yn anodd.
   "Fe ddaeth rhywun i siarad â ni ddeunaw mis yn ôl," meddai'r Ditectif Brif Uwcharolygydd Wynne Phillips. "Ar ôl dod o hyd i dystiolaeth newydd, fe benderfynon ni hala dau dditectif i Israel. Ryn ni'n optimistaidd."

Mae tîm arbennig o dditectifs yn ailedrych ar 14 o lofruddiaethau sy' heb eu datrys, gyda'r bwriad o ddod o hyd i dystiolaeth newydd. Fe gafodd y llofruddiaeth gynta' ei chyflawni yn 1952.

Stori'r Corff
Roedd criw o fechgyn yn llawn antur pan ddisgynon nhw i lawr twll hen chwarel mwyn haearn rhwng Gwaelod-y-Garth a Pentyrch yn 1963.

Ond fe drodd yr hwyl yn hunlle' pan ddringon nhw i mewn i ogof 200 troedfedd o ddyfnder a dod o hyd i gorff Patricia Simpson, putain o Adamsdown, Caerdydd.

Roedd rhywun wedi taflu'r corff i lawr y twll ar ôl tagu Patricia a'i sgarff sidan du ei hun. Mae'n debyg fod y llofrudd yn sïwr na fyddai neb yn dod o hyd i gorff mewn lle mor ynysig.

Ar y pryd roedd yr heddlu'n optimistaidd achos am y tro cynta' yn eu hanes, fe ddefnyddion nhw luniau gwneud Identikit wrth chwilio am y llofrudd.

Fe gyhoeddon nhw lun o "ddyn cyhyrog a phryd tywyll" yn ei bedwardegau cynnar ar ôl i rywun ei weld mewn Morris Minor 1000 du yn hwyr y nos yn Nociau Caerdydd.
Cafodd 5,000 o bobol eu holi a chafodd chwarter miliwn o geir eu harchwilio.

Ond dau fis ar ôl y llofruddiaeth, roedd tro annisgwyl. Cyhoeddodd yr heddlu lun o yrrwr arall, dyn tenau o daldra canolig yn ei ugeiniau hwyr. Roedd 'na amheuaeth ei fod yn gysylltiedig â llythyr a gafodd ei ddanfon at Patricia yn sôn am drefnu cyfarfod.