Rhowch eich barn! Edrychwch allan am bosteri.

Gðyl Rygbi dan 10 ac 11
Pentyrch
Cafwyd Gðyl Rygbi lwyddiannus iawn ar gaeau rygbi Parc-y-Dwrlyn, Pentyrch ar ddydd Sul y trydydd o Fedi. Daeth deg o dimau ynghyd, rhai o Orllewin Cymru, eraill dros Bont Hafren, i gystadlu am gwpan her Pentyrch! Wedi cystadlu brwd drwy'r dydd, mewn tywydd rygbi gwych, daeth y tîm dan 11 yn ail yn eu hadran hwy ond gyda chymorth Mathew Phillips, Rhys Jones a Morgan Rhys, enillodd y tîm dan 10 y bencampwriaeth! Da iawn chi, hogie! Diolch yn arbennig i Ken Mills, am ei holl waith trefnu ardderchog a olygai bod pob dim yn rhedeg fel wats. Dechrau da iawn i flwyddyn Gareth Davies, Parc Castell y Mynach yn Gadeirydd. Gobeithio y cant flwyddyn dda!

Teithio'r Byd
A ninnau wedi dymuno'n dda i ddwy o ferched ifanc y pentref sydd bellach ym mhen draw'r byd, yn rhifyn diwethaf Tafod Elái - tybed a ddaw Fiona  a Siwan ar draws Rwth Ellis-Owen ar eu teithiau?
    Ar ôl treulio pythefnos yng ngwlad Thai - mae Rwth bellach wedi cyrraedd Awstralia. Mynd yno fel rhan o'i chwrs prifysgol y mae Ruth - i astudio 'Forensic Pathology' am ddau fis, yn ysbyty Westmead yn Sydney - cyn dychwelyd i orffen blwyddyn ola yng ngholeg meddygaeth Caerdydd.
   Os digwydd i chwi wylio seremoni agoriadol y Gemau Olympaidd yn Sydney, efallai i chi gael cip ar Rwth - oedd, roedd hi yno! Anfon air atom o hemisphere y de - gyda ychydig o'th hanes, Ruth - a dere adre'n saff.

Newydd i'r nyth!
Croeso Gwyn, a llongyfarchion fil i Anwen a Dave Robins, Parc Castell y Mynach ar enedigaeth eu mab bach - Gwyn Robins - rai misoedd yn ôl bellach. Tasai'r newyddion yma wedi cymryd ychydig yn hwy i gyrraedd y papur, basai Gwyn yn darllen y pwt yma drosto 'i hun!

Ennill ei radd
Llongyfarchiadau i Nathan Hall, Maes y Dderwen, ar ennill ei radd mewn Daearyddiaeth o brifysgol Abertawe yr haf yma. Pob dymuniad da yn dy swydd newydd.

Degau o DGAU's
Braf cofnodi llwyddiannau cymaint o gyn-ddisgyblion ysgol Gynradd Creigiau yn arholiadau TGAU eleni. Da iawn chi i gyd ar ennill graddau clodwiw iawn sy'n eich galluogi chi i barhau efo'ch astudiaethau - ymlaen at y gris nesa nawr! Sori - mae'na fwy! Llongyfarchiadau mawr i Sara Canning, Rhiannon Croot, Kate Staple, Elin Haf Williams, Huw ap Rhys a Daniel Hooper.

Lefel'A' Ardderchog!
Llongyfarchiadau gwresog a phob dymuniad da i'r dyfodol i Virginia MacDonald a Menna Davies gafodd ganlyniadau arbennig yn eu harholiadau Lefel 'A' eleni. Bwriada Virginia fynd i Brifysgol Coventry i astudio 'physiotherapy', ac mae Menna yn mynd i ddilyn cwrs meddygaeth ym Mhrifysgol Lerpwl. Dymuniadau gorau hefyd i Ywain ap Rhys sydd bellach ar ei ffordd i Brifysgol Southampton i ddilyn cwrs gradd mewn 'Yacht and Powercraft Design' - maddeuer yr iaith fain! Treuliodd Ywain flwyddyn yn gweithio dan hyfforddiant yn T.R.W. ym Mhontypool ar ôl llwyddo yn ei Lefel 'A' y llynedd.

'Sgôr' ardderchog i Siwan
Da iawn wir, Siwan Rhys ar ennill ei Gradd 4 mewn theori ychydig yn ôl. Bydd Siwan yn gweithio tuag at ei Gradd 6 ar y piano nesa, ynghyd â'i Gradd 5 mewn theori. Dal ati Siwan.

Creigiau Diogel
Ers ei sefydliad ym 1998, mae'Safe Creigiau Diogel' wedi bod yn ymgyrchu dros ddiogelwch ar y ffyrdd yng Nghreigiau. Mae un dyn lolipop gyda ni yn barod ac mae'r cyngor yn hysbysebu am un arall ar hyn o bryd. (Gweler yr hysbyseb yn Tafod Elái y mis hwn!)
   Llynedd cyflwynodd y cyngor gynnig i'r Cynulliad am arian i gefnogi cynllun 'Safe Routes to School' gyda help y grðp a'r gymuned. Yn y flwyddyn newydd clywon ni bod y cynnig wedi llwyddo. Mae £76,000 ar gael i wella diogelwch ar y ffyrdd yn y pentref fydd yn helpu plant i gyrraedd yr ysgol yn ddiogel ond fydd yn gwella'r sefyllfa yn y pentref yn gyffredinol hefyd. Cyn bo hir bydd cynlluniau ar gael a bydd aelodau o'r cyngor yn dod i'r pentref i drafod eu hawgrymiadau.