DATHLU'R NADOLIG
Bu cymdeithasau a mudiadau'r Gilfach wrthi yn dathlu'r Nadolig yn ôl eu harfer, a chynhaliwyd llawer o giniawau a phartïon ac ati, Gwahoddwyd eglwysi ' r cwm i eglwys Moreia nos Sul Rhagfyr l7ed i Wasanaeth Carolau. Ar derfyn yr oedfa mwynhaodd pawb gwpanaid o de a 'mince pie'.
Ar Noswyl y Nadolig cynhaliwyd Gwasanaeth Plygain i groesawi'r Dydd Sanctaidd yng nghapel Calfaria. Daeth ffrindiau o Moreia a Bethlehem Tonyrefail i ymuno ac i gymeryd rhan yn yr oedfa.

BENDITHIO A DIOLCH
Roedd Nos Galan yn noson arbennig o hapus i ffyddloniaid Eglwys Sant Barnabas gan i Archddeacon Margam Y Gwir Barchedig Martin Williams a'r Deon Gwlad Y Parch Peter Coleman wedi eu cynorthwyo gan y Ficer y Parch Stephen Ambani gynnal Gwasanaeth o Ddiolch ac Adferiad i ailagor a bendithio' r eglwys a fu ar gau ers y tân ym mis Mai. Bu'n rhaid i'r Gynulleidfa addoli yn Neuadd yr Eglwys oherwydd y difrod a wnaed gan y tân. Maent yn ôl yn yr Eglwys yn awr ac am ddiolch o galon i bawb a gyfrannodd mor hael ag a weithiodd mor galed i godi'r arian tuag at adfer yr adeilad.

BADMINTON

Unwaith eto mae Gareth Walters wedi cael dechreuad ardderchog i'r tymor Badminton . Mae Gareth sydd yn l7oed wedi cyrraedd yr 8 olaf ym mhob cystadleuaeth i unigolion yn Lloegr a Ewrop dan 19 oed ac wedi dod o fewn trwch blewyn i'r gêm cyn-derfynol sawl gwaith. Enillodd Gareth Bencampwriaeth Cymru i rai dan 19 oed a chafodd ei wobrwyo mewn cyfarfod arbennig yn y Ganolfan Chwaraeon Cenedlaethol yng Ngerddi Soffia Caerdydd. Trechodd bencampwr Estonia sy'n astudio ym Mangor ar hyn o bryd.
Pob hwyl i Gareth fydd yn cystadlu ym Mhencampwriaethau Colegau Prydain yn ysgol Millfield, lle cafodd y wobr efydd y llynedd. Bydd yn cynrychioli Coleg Penybont lle mae'n astudio am Ddiploma BTec mewn Gwyddor Chwaraeon. Y flwyddyn nesaf mae'n gobeithio mynd i Goleg U.W.I.C. Caerdydd i barhau gyda'i astudiaethau chwaraeon.

YN GWELLA
Mae'n braf i weld Mike Webb yn cerdded o gwmpas y lle unwaith eto wedi'r llawdriniaeth i'w glun.
Dymuniadau gorau am wellhad buan i Richard Parry, High Street a dorrodd ei goes yn chwarae rygbi dros Gilfach cyn y Nadolig. Mae Richard yn gyn-ddisgybl yn ysgol Llanhari ac wrth ei fodd yn chwarae rygbi.

Ymddeol
Dymuniadau gorau i Meima Morse, Heol yr Eglwys, Tonteg,  sydd wedi ymddeol o'i swydd fel Prifathrawes Ysgol Gymraeg y Bronllwyn. Yn barod mae hi wedi profi pleserau tywydd braf yr Ynysoedd Dedwydd a nawr mae hi'n cynorthwyo ym mywyd ardal Llangeithio yn ogystal â'r ardal hon.