Daeth yn amlwg yng nghynhadledd Rhieni Dros Addysg Gymraeg yn Ysgol Rhydfelen ar ddydd Sadwrn olaf mis Ebrill fod problemau di-ri gan rieni sydd am i'w plant gael addysg cyfrwng Gymraeg. Mae cyfyngyiadau ar niferoedd mewn dosbarthiadau meithrin a diffyg darpariaeth lleol yn bynciau llosg mewn sawl ardal yn Ne Cymru.
   Erbyn hyn mae 1 o bob 8 o blant Caerdydd yn cael addysg Gymraeg ond mae angen nifer o ysgolion cymunedol ychwanegol i ateb y galw. Er fod canran uwch yn cael addysg Gymraeg yn Rhondda Cynon Taf nid oes llawer o gynydd yn y ddarpariaeth wedi bod yn ddiweddar ac araf yw'r cyngor i ddarparu ysgolion Cymraeg yn Aberpennar a Meisgyn.   
   Y gair mawr a ddefnyddiwyd oedd

'argaeledd' - sef gwneud addysg Gymraeg ar gael i bawb ac o fewn cyrraedd. Roedd cynyddu maint yr ysgolion presennol gyda 400--500 o blant ddim yn ateb parhaol, teimlai'r rhieni fod angen i'r ysgolion fod yn rhai cymunedol Cymraeg.
   Roedd y cyfrifoldeb yn bendant ar y cynghorau lleol i ddarparu addysg Gymraeg i bawb ac roedd y gynhadledd am i'r Cynulliad sicrhau fod hyn yn cael ei weithredu.
   Felly mae digon o waith i'w wneud o hyd ac mae rhoi cefnogaeth i fudiad Rhag yn bwysig i sicrhau fod yr iaith yn ail-sefydlu ar seiliau cadarn yn yr ardal hon.