Aeth Cymdeithas Gymraeg Llantrisant ar daith ar gamlas Aberhonddu i orffen eu tymor o weithgareddau.
   Roedd y cwch yn orlawn ar gyfer y daith i lawr y cwm drwy loc Brynich a thros yr Afon Wysg. Trefnwyd y diwrnod gan John Edmunds.

Mae Menter Iaith Caerdydd wedi penodi Sian Lewis, sy'n Is-Gyfarwyddydd yr Urdd yn y De gyda chyfrifoldeb dros Gaerdydd a'r Fro, fel Swyddog Datblygu newydd y Fenter. Bu Sian yn brysur iawn dros y ddwy flynedd diwethaf ynghyd ag eraill o staff yr Urdd a llu o wirfoddolwyr lleol yn paratoi at yr Eisteddfod ym Mharc Bute.
   Mae'r penodiad yn un amserol iawn gan fod y Fenter yn ffyddiog fod llwyddiant digamsyniol yr Eisteddfod wedi bod yn hwb aruthrol i ymdrechion y rhai sydd am weld y Gymraeg ar wefusau nifer cynyddol o blant, pobl ifanc ac oedolion y brifddinas.
   Mae Sian, sy'n byw ym Mhontcanna, wedi ei magu yng Nghaerdydd. Bu'n ddisgybl yn Ysgolion Bryntaf a Glantaf cyn cymhwyso mewn Astudiaethau Busnes o Brifysgol Caerdydd. Mae'r Fenter, sy'n cael cefnogaeth ariannol gan Fwrdd yr Iaith Gymraeg, yn

benderfynol o sicrhau bod y Gymraeg yn cael lle canolog ym mhob agwedd o fywyd y ddinas.  Rhan allweddol o waith Sian fydd cydweithio gyda'r Urdd a llu o bartneriaid eraill gan gynnwys Cyngor Sir Caerdydd i ehangu'r cyfleoedd a'r ddarpariaeth i Gymry Cymraeg a dysgwyr o bob oedran i ddefnyddio'r iaith.   

John Rowlands
Cadeirydd Menter Caerdydd