<< Tudalen Blaenorol

Tudalen Nesaf >>

CROESO I FFION ELEN - Llongyfarchiadau i Lowri a Jeremy Jones, 21 Clos y Brenin, Pontyclun ar enedigaeth Ffion Elen. Hi yw eu merch fach gyntaf anedig ac fe'i ganed hi yn ysbyty Brenhinol Morgannwg, Llantrisant. Mae Lowri yn gyn-ddisgybl o Ysgol Llanhari ac yn ferch hynaf Lyn ac Angela Devonald o Bentyrch.

ADRODDIAD AM DAITH CÔR IAU RICHARD WILLIAMS I'R ALMAEN A'R ISELDIROEDD

Soniais rai misoedd yn ôl bod Catrin Greaves, Heol y Pistyll, Llantrisant wedi ymuno â Chôr Iau Richard Williams, Tonyrefail.  Mae Catrin, sy'n unarddeg blwydd oed, yn hoff iawn o ganu yn ogystal â darllen ac ysgrifennu.  Cytunodd hi, yn garedig iawn, i roi adroddiad i ni am ei thaith i'r cyfandir gyda'r côr yn ystod gwyliau'r haf - dyma'r hanes:

Rwyf wedi bod yn aelod o Gôr Plant Richard Williams am flwyddyn ac yn ystod y gwyliau haf cefais i gyfle ardderchog i ganu mewn tri chyngerdd yn yr Almaen a'r Iseldiroedd gyda gweddill y côr (sydd yn mynd ar drip tebyg bob dwy flynedd).  Dyma'r tro cyntaf i mi fod ar drip canu ar roeddwn i yn edrych ymlaen yn fawr iawn.
   Roedd y daith yno yn hir ac yn ddiflas.  Cwrddon ni yng Nghanolfan Cerddoriaeth Tonyrefail (lle bu ymarferion côr bob dydd Mawrth a Iau) yn gynnar, gynnar y bore a chychwyn ar ein taith i Valkenburg.  Cyrhaeddon ni'n hwyr y nos yn flinedig iawn.  Roedden ni'n aros yng ngwesty Dupuis ac roedd gan y côr y gwesty cyfan i'w hunain. 
   Yn anffodus, nid oedd Mr Williams ei hun yn gallu dod ar y trip yma, ond roedd yn llwyddiant ta beth. Gyda'r cyngerdd cyntaf rownd y gornel roedd pawb yn gyffrous, yn enwedig y plant llai (mae'r côr yn derbyn plant o 7 oed i 18) a merch Mr  Williams, Margaret oedd yn cymeryd ei le am y tro cyntaf!  Roedd y gyngerdd yma yn y 'bandstand' leol ble roedd pawb a oedd yn pasio yn gallu gwrando arnon ni'n canu.  Mae'r caneuon a ganon ni yn cynnwys "Dwylo dros y Môr", "Suo Gân", "Ar Lan y Môr",

ARHOLIAD PIANO
Llongyfarchiadau i Carys Tudor, Meisgyn fu'n llwyddiannus yn ei harholiad piano Gradd I nôl yn yr haf - dwi'n flin bod y llongyfarchion yn hwyr Carys, ond da iawn ti beth bynnag!

PRIODAS
Hoffwn ddymuno'n dda i Alison Theaker a Roy Meaden a briodwyd yn Eglwys Meisgyn ar 19 Hydref.  Bu plant Alison - Bethan a Mitchell -  yn ddisgyblion yn YGG Llantrisant ac mae'r ddau yn mynychu Ysgol Gyfun Llanhari ar hyn o bryd.  Roedd Bethan yn forwyn i'w mam a Mitchell gerddodd ei fam i fewn i'r Eglwys ar y diwrnod mawr.  Rwyn deall i Mitchell wneud araith yn ystod y wledd a gwneud jobyn da iawn ohoni hefyd!  Llongyfarchiadau i chi gyd fel teulu a gobeithio y cawsoch chi, Alison a Roy, fis mêl hyfryd ym Mhortiwgal.

GÐYL SHAKESPEARE
Bu rhai o bobl ifanc yr ardal yn cymryd rhan yng Ngðyl Ddrama Shakespeare i ysgolion yn ddiweddar.  Mae'r Ðyl ar ei thrydedd flwyddyn - dechreuwyd hi dwy flynedd yn ôl yn Sir Benfro a'r llynedd symudodd i Lundain lle perfformiodd dros 60 ysgol ynddi.  Eleni, gyda chefnogaeth Llywodraeth Cynulliad Cymru, Cyngor Celfyddydau Cymru a Chaerdydd 2008, daeth hi nôl i Gymru.  Cymrodd 2,500 o actorion ifanc ran mewn 100 cynhyrchiad mewn 11 theatr ledled Cymru rhwng y 1af a'r 18fed o Hydref a bu disgyblion Blwyddyn 10 yr Adran Ddrama Ysgol Llanhari yn Theatr y Sherman yn perfformio'r Dymestl.

Defnyddiodd yr ysgolion y sgriptiau a ddefnyddiwyd gan S4C a BBC Cymru pan crynhowyd deuddeg o ffefrynnau Shakespeare i hanner awr yr un ar gyfer "Shakespeare -Y Chwedlau Animeiddedig".  Roedd rhyddid i berfformio yn y Saesneg neu'r Gymraeg - a mae'n debyg i rai

ysgolion roi perfformiadau dwyieithog!

Nid cystadleuaeth mohoni ond ffordd o gyflwyno Shakespeare i ddisgyblion a rhoi'r profiad iddynt o berfformio drama mewn theatr mewn cydweithrediad â staff ac actorion proffesiynol - rhai wythnosau cyn y perffomiad cafwyd ymweliad â gweithdy gan actorion o Dramarama sy'n gysylltiedig â'r 'Royal Shakespeare Company'.

Cafwyd perfformiad proffesiynol tu hwnt gan griw Ysgol Llanhari - cynhyrchwyd eu perfformiad a hyfforddwyd y disgyblion gan Mrs Lowri Cynan a Miss Manon Edwards. Y disgyblion fu'n perfformio yn y Sherman ar y 9fed o Hydref o'r ardal hon oedd Catrin Evans, Emma Wilkins, Ceri South ac Alex Vlahos - diolch am eich holl waith caled a gobeithio y gwnaethoch fwynhau perfformio gymaint ag y gwnaeth y gynulleidfa fwynhau eich gwylio.

Y DIWEDDARAF AR Y TESCO NEWYDD
Mae'n debyg na fydd y Tesco newydd sy'n cael ei adeiladu ar safle'r hen Homeworld yn Nhonysguboriau yn barod nes haf 2003 neu hyd yn oed yn hwyrach.  Yn wreiddiol, mi oedd i fod i agor erbyn y Nadolig eleni, ond oherwydd problemau, yn gyntaf gyda phibellau nwy a wedyn gyda lefelau sylfeini, bu oedi cyn dechrau ar y gwaith.

Mae hyn yn golygu y bydd y problemau parcio yn y dref yn parhau gan bod cyfyngu ar y nifer o oriau y medrwch barcio ym maes parcio'r Tesco presennol a'r ffaith nad yw'n bosib parcio ger yr orsaf fysiau nawr am fwy na hanner awr heb gael eich 'clampio'. Mae hyn oherwydd bod cwmni preifat wedi cymryd y safle drosodd ac yn llym iawn gyda'u rheolau.



Drosodd >

<< Tudalen Blaenorol

Tudalen Nesaf >>