Mae Bwrdd yr Iaith Gymraeg yn gwahodd unrhyw un sydd â diddordeb i fod yn rhan o lunio'r strategaeth genedlaethol gyntaf ar dechnoleg gwybodaeth a'r Gymraeg.
   Mae'r Bwrdd, ar y cyd â Chymru Ar-lein yn y Cynulliad Cenedlaethol, wedi datblygu holiadur arbennig, sy'n cynnwys cwestiynau am nifer o feysydd cyfrifiadurol. Bydd yr ymgynghoriad cyhoeddus yn parhau drwy'r haf, a'r dyddiad cau ar gyfer sylwadau yw dydd Gwener 19 Medi. Bydd dogfen strategol yn cael ei llunio yn sgîl hyn ac ymgynghorir ar y ddogfen hon yn 2004.
   Gellir llwytho'r holiadur o safle'r Bwrdd ar y we (www.bwrdd-yr-iaith.org.uk). Bydd copïau hefyd yn cael eu dosbarthu i gysylltiadau'r Bwrdd yn y maes ac mae croeso i unrhyw un sydd â diddordeb yn y pwnc ymweld â'n safle gwe neu i gysylltu â'r Bwrdd ar 029 2087 8000 am gopi o'r holiadur.

Newid Gyrfa.
Pob hwyl i Nerys Brown, Nun's Cres., Graigwen wrth iddi gychwyn ar ei chwrs ymarfer dysgu yn yr Athrofa yng Nghaerdydd. Tan yn ddiweddar buodd Nerys yn gweithio fel bwrsar yn Ysgol Gyfun Cwm Rhymni.

Pen-blwydd Hapus!!
Llongyfarchiadau i ddau o ddarllenwyr Tafod Elái buodd yn dathlu pen-blwyddi arbennig ym mis Gorffennaf -- sef Martyn Geraint, Ynysybwl a Daniel Thomas, Pantygraigwen.

Ymddeol.
Dymuniadau gorau i Sian Thomas, Graigwen Parc ar ei hymddeoliad. Buodd Sian yn dysgu am nifer o flynyddoedd yn Ysgol Gymraeg Llwyncelyn, Porth.

Graddio.
Llongyfarchiadau i Lowri Mair Jones, Y Comin ar ennill gradd 2.1 mewn Cerddoriaeth ym Mhrifysgol Manceinion.
   Hefyd Lowri Mared Davies, Cilfynydd a raddiodd mewn Hanes ac Astudiaethau Americanaidd ym Mhrifysgol Abertawe.

Priodasau'r Haf.
Llongyfarchiadau i Geraint Jones, gynt o Bontypridd, a briododd ei gariad, Michelle, mewn pentref tu allan i Hungerford. Maent wedi mynd i grwydro'r byd am flwyddyn ond yn mawr obeithio dod nôl i Gymru i fyw!
   Aeth Sian Jones a'i chariad Richard Lewis mor bell â Las Vegas i briodi ym Mis Awst. Aeth rhieni y ddau gyda nhw i fod yn dystion i'r briodas. Mae'n siwr bydd straeon diri ganddynt i'w hadrodd i'r teulu a'r ffrindiau yn yr ardal sy'n dymuno'n dda iddynt. Maent wedi ymgartrefu ym Maesycoed.
   Priododd Clare Morgan a Gavin Rees yng Nghapel Bethel, Y Ddraenen Wen. Athrawes yw Clare yn Ysgol Gyfun Rhydywaun ond mae hi hefyd yn aelod o Gôr Godre'r Garth.
   Ei dymuniad oedd i'r côr ganu yn ei phriodas ac felly bu! Fe ganon nhw "Nefol Addfwyn Oen" ac "Am Brydferthwch". Ai dyma'r tro cyntaf iddyn nhw ganu ym mhriodas un o'u aelodau?
   Roedd Eleri Darkins wedi cyrraedd nôl o Wlad Thai, aelod arall o'r cor, i ganu'r delyn yn ystod y gwasanaeth.

Syrpreis, Syrpreis!
Pan ddaeth Anna Jones a'i chwaer, Kathleen lawr i dreulio penwythnos gyda Dilys Davies fe aeth noson fach dawel yng Nghlwb y Bont ar y nos Sadwrn yn dipyn o noson i'w chofio. Roedd Dil wedi trefnu bod criw o'r "hen ffrindiau" yn aros amdani yn yr ystafell gefn i ddymuno pen-blwydd hapus ac ymddeoliad hapus hefyd! Mae 7 mlynedd bellach ers i Anna adael Pontypridd ar ôl treulio nifer o flynyddoedd yn yr ardal yn gweithio fel athrawes, athrawes fro a phrifathrawes.Aeth hi nol i'w hardal enedigol, Pen Llyn, i fod yn brifathrawes yno.
   Dymuniadau gorau am ymddeoliad hapus gan holl ddarllenwyr Tafod Elái. Bydd digon o gyfle i wneud y siwrne lawr o Abersoch i Rhondda Cynon Taf yn amlach!